राजगुरूनगरमध्ये धक्कादायक घटना; मामाचा खून करून भाच्याची आत्महत्या

राजगुरूनगर  | १९ सप्टेंबर २०२६

मुख्य संपादक : डॉ. निरंजन खंडागळे
सह संपादक : श्री. कैलास केदारी

राजगुरूनगर शहरातील माधवनगर परिसरात एकाच घरात हत्या आणि आत्महत्येची धक्कादायक घटना घडल्याने परिसरात खळबळ उडाली आहे. आजारपणामुळे उपचारासाठी भाच्याच्या घरी वास्तव्यास असलेल्या मामाचा भाच्याने धारदार कोयत्याने मानेवर वार करून खून केल्याची प्राथमिक माहिती आहे. त्यानंतर संबंधित भाच्याने त्याच घरात गळफास घेऊन आत्महत्या केल्याचे समोर आले आहे.

या घटनेत संदीप वामन गडदे (वय ४३) यांचा मृत्यू झाला असून, प्रवीण कैलास कोहिणकर (वय २०) याने आत्महत्या केल्याची माहिती समोर आली आहे.

उपचारासाठी मामाचा भाच्याच्या घरी मुक्काम

मिळालेल्या प्राथमिक माहितीनुसार, संदीप गडदे हे गेल्या काही महिन्यांपासून आजारी होते. उपचार आणि देखभालीसाठी ते सुमारे दोन महिन्यांपासून राजगुरूनगर येथील माधवनगर परिसरात राहणाऱ्या आपल्या भाच्याच्या घरी वास्तव्यास होते.

मानेवर कोयत्याने वार

शनिवारी सकाळच्या सुमारास घरात अचानक हा प्रकार घडला. प्रवीण कोहिणकर याने धारदार कोयत्याने संदीप गडदे यांच्या मानेवर वार केल्याची प्राथमिक माहिती आहे. गंभीर दुखापतीमुळे संदीप यांचा मृत्यू झाल्याचे सांगण्यात येत आहे. त्यानंतर प्रवीणने त्याच घरात गळफास घेऊन आत्महत्या केली.

एकाच घरात मामाचा मृतदेह रक्ताच्या थारोळ्यात, तर भाचा गळफास घेतलेल्या अवस्थेत आढळल्याने कुटुंबीयांसह परिसरातील नागरिकांना मोठा धक्का बसला.

सुसाईड नोट आढळल्याची माहिती

घटनेची माहिती मिळताच पोलिसांनी घटनास्थळी धाव घेतली. घटनास्थळाच्या पाहणीदरम्यान प्रवीणने लिहिलेली सुसाईड नोट आढळल्याची माहिती आहे. या चिठ्ठीत ‘मामाच्या त्रासाला कंटाळून हे पाऊल उचलत आहे’, असा उल्लेख असल्याचे प्राथमिक तपासात समोर आले आहे.

मात्र, हा कथित त्रास नेमका कोणत्या कारणामुळे होता, याबाबत अद्याप अधिकृतपणे स्पष्टता झालेली नाही. या घटनेमागे कौटुंबिक, आर्थिक किंवा अन्य कोणते कारण होते का, याचा तपास पोलीस करत आहेत.

खेड पोलिसांकडून तपास सुरू

घटनेची माहिती मिळाल्यानंतर पोलिसांनी घटनास्थळी पंचनामा करून दोन्ही मृतदेह ताब्यात घेतले. मृतदेह शवविच्छेदनासाठी राजगुरूनगर येथील ग्रामीण रुग्णालयात पाठविण्यात आल्याची माहिती आहे.

सुसाईड नोट, घटनास्थळावरील पुरावे आणि इतर उपलब्ध माहितीच्या आधारे खेड पोलीस पुढील तपास करीत आहेत. या घटनेमुळे माधवनगर परिसरात हळहळ व्यक्त होत असून, एकाच घरात घडलेल्या हत्या आणि आत्महत्येच्या या घटनेने परिसर हादरला आहे.