दिवेआगरच्या समुद्रकिनारी आळंदीच्या ८ विद्यार्थ्यांचा बुडून दुर्दैवी मृत्यू

दिवेआगर (रायगड) : २ ऑक्टोबर २०२६

मुख्य संपादक : डॉ. निरंजन खंडागळे

सह संपादक : श्री कैलास केदारी

रायगड जिल्ह्यातील प्रसिद्ध दिवेआगर समुद्रकिनारी सहलीसाठी गेलेल्या आळंदी येथील विनर्स अकॅडमीच्या आठ विद्यार्थ्यांचा समुद्रात बुडून दुर्दैवी मृत्यू झाल्याची हृदयद्रावक घटना गुरुवारी (१ ऑक्टोबर) सायंकाळी घडली. या दुर्घटनेने आळंदीसह पुणे आणि रायगड जिल्ह्यावर शोककळा पसरली आहे.

नेमकी घटना काय घडली?

आळंदी येथील विनर्स अकॅडमीचे २५ विद्यार्थी, १७ विद्यार्थिनी आणि ६ शिक्षक, असे एकूण ४८ जण सहलीसाठी दिवेआगर येथे गेले होते. समुद्रकिनारी पोहोचल्यानंतर काही विद्यार्थी समुद्रात पोहण्यासाठी उतरले. त्यावेळी समुद्राच्या पाण्याची खोली आणि प्रवाहाचा अंदाज न आल्याने आठ विद्यार्थी पाण्याच्या प्रवाहात वाहून गेले. ही घटना सायंकाळी सुमारे ५.३० वाजण्याच्या सुमारास घडल्याचे वृत्त आहे.

घटना लक्षात येताच सहकारी विद्यार्थी, शिक्षक, स्थानिक नागरिक आणि जलक्रीडा व्यावसायिकांनी बचावासाठी धाव घेतली. विद्यार्थ्यांना समुद्रातून बाहेर काढून तातडीने प्राथमिक उपचार व सीपीआर देण्याचा प्रयत्न करण्यात आला. मात्र आठही विद्यार्थ्यांचा मृत्यू झाला.

मृत विद्यार्थ्यांची नावे

या दुर्घटनेत मृत्युमुखी पडलेल्या विद्यार्थ्यांची नावे पुढीलप्रमाणे असल्याचे वृत्त आहे—

– यश किरण वानखेडे

– सोहम तुकाराम भांडवलकर

– तन्मय दत्तात्रय वाहिले

– कौस्तुभ संदीप दौंड

– कैवल्य सतीश वासनकर

– राजवीर युवराज वहिले

– प्रणव रामदास बनसोडे

– सुमीत भरत अहिरे

वाळूतील खड्डे आणि समुद्राच्या प्रवाहाचा अंदाज?

दिवेआगर किनाऱ्यावरील काही भागात भरतीचे पाणी रोखण्यासाठी बांध करण्यात आले आहेत. त्यावर आपटून पाणी परत जात असताना वाळूमध्ये खड्डे तयार झाल्याची प्राथमिक माहिती समोर आली आहे. विद्यार्थी समुद्रात उतरले त्यावेळी ओहोटी होती. पोहत असताना पाण्याच्या प्रवाहामुळे विद्यार्थी अशाच एखाद्या खड्ड्याच्या दिशेने ओढले गेले असावेत, असा प्राथमिक अंदाज व्यक्त करण्यात आला आहे. मात्र दुर्घटनेचे नेमके कारण अधिकृत तपासातून स्पष्ट होणे अपेक्षित आहे.

सुरक्षाव्यवस्थेवर प्रश्नचिन्ह

या दुर्घटनेनंतर शैक्षणिक सहलीदरम्यान विद्यार्थ्यांच्या सुरक्षेसाठी आवश्यक उपाययोजना करण्यात आल्या होत्या का, समुद्रात जाण्यापूर्वी विद्यार्थ्यांना योग्य सूचना देण्यात आल्या होत्या का आणि प्रतिबंधित भागात विद्यार्थी कसे गेले, याबाबत प्रश्न उपस्थित झाले आहेत.

राज्याचे आपत्ती व्यवस्थापन मंत्री गिरीश महाजन यांनी दुर्घटनेची सखोल चौकशी करण्याचे निर्देश दिले आहेत. विद्यार्थ्यांच्या संख्येच्या तुलनेत देखरेखीसाठी पुरेसे शिक्षक किंवा जबाबदार व्यक्ती उपस्थित होत्या का, सुरक्षा नियमांचे पालन झाले का, याचीही चौकशी करण्याच्या सूचना देण्यात आल्या आहेत.

आळंदी शहरावर शोककळा

आठ विद्यार्थ्यांच्या मृत्यूची बातमी आळंदीत पोहोचताच पालक आणि नातेवाइकांमध्ये आक्रोश निर्माण झाला. संबंधित अकॅडमीसमोर मोठ्या संख्येने पालक व नातेवाईक जमा झाले होते. परिस्थिती लक्षात घेऊन पोलिसांनी तेथे बंदोबस्त वाढवला. मृत विद्यार्थ्यांना श्रद्धांजली वाहण्यासाठी २ ऑक्टोबर रोजी अत्यावश्यक सेवा वगळता आळंदी बंद ठेवण्याचे आवाहन करण्यात आले आहे.

प्रशासनाकडून चौकशी सुरू

या घटनेनंतर रायगड प्रशासन आणि पोलीस यंत्रणा घटनास्थळी दाखल झाली. दुर्घटनेची कारणे, विद्यार्थ्यांच्या सुरक्षेची व्यवस्था आणि सहलीचे नियोजन याबाबत तपास सुरू आहे. मुख्यमंत्री देवेंद्र फडणवीस यांनीही प्रशासनाशी संपर्क साधून आवश्यक मदत व कार्यवाही करण्याच्या सूचना दिल्याचे वृत्त आहे.

आठ तरुण विद्यार्थ्यांच्या अकाली मृत्यूमुळे त्यांच्या कुटुंबीयांवर दुःखाचा डोंगर कोसळला असून, एका आनंदाच्या सहलीचे रूपांतर क्षणार्धात आयुष्यभर न विसरता येणाऱ्या दुःखद आठवणीत झाले आहे.